कांग्रेसको आन्दोलनपछि प्रहरीले अभियुक्तहरुलाई समाई कानुनी प्रक्रियामा ल्यायाे

गुल्मी, ८ असोज । रेसुङ्गा नगरपालिका–१२ मा रहेको रानीपोखरी निमाविको भवन निर्माणका विषयमा सत्तारुढ दल नेपाल कम्युनिष्ट पार्टी (नेकपा) र नेपाली कांग्रेस कार्यकर्ताबीच भएको विवादकाबारेमा नेपाली कांग्रेस गुल्मीले पत्रकार सम्मेलन गरेको छ । पत्रकार सम्मेलनमा घटनापछि भएका वार्तामा भएका सहमतीबारे जानकारी गराएको थियो । बिहिबार गुल्मी पार्टी कार्यालय बी.पी.स्मृति भवन तम्घासमा पत्रकार सम्मेलनको आयोजना गरि गत मंगलबार जिल्ला प्रशासन कार्यालयमा भएको सर्वदलिय बैठकले गरेका सहमतीका बिषयमा जानकारी गराइएको हो ।

रेसुङ्गा नगरपालिका–१२ मा रहेको रानीपोखरी निमाविको भवन निर्माणका विषयमा नेकपा र कांग्रेस कार्यकर्ताबीच भएको विवादले चरम उत्कर्ष रुप लिएपछि नेकपाका कार्यकर्ताले कांग्रेसका कार्यकर्ता कुटपिट गरि घाइते बनाएका थिए ।

आफ्ना कार्यकर्ता कुटपिट गर्नेलाई किटानीसहित जाहेरी दिँदा पनि प्रहरीले कुटपिटमा संलग्नलाई कारबाही नगरेपछि कांग्रेसले आन्दोलन थालेको थियो ।शान्तिपूर्ण रुपमा ज्ञापनपत्र बुझाउन जिल्ला प्रशासन कार्यालय पुग्नुभएका पार्टी सभापति भुवनप्रसाद श्रेष्ठ एवं प्रदेश क्षेत्रीय सभापति पूर्ण के.सी. लगायतका नेता कार्यकर्ताहरु प्रहरीको दमनपछि घाइते हुनुभएको थियो ।

सोही बिषयलाई समाधानका लागि भएको वार्तामा कांग्रेसका कार्यकर्ता कुटपिटमा संलग्नलाई कानुनअनुसार कारवाही गर्न गुल्मी प्रशासन सहमत भएपछि गुल्मी कांग्रेसले धर्ना तथा आन्दोलनको कार्यक्रम स्थगित गरेको थियो । पत्रकार सम्मेलनमा कांग्रेसको आन्दोलनपछि प्रहरीले अभियुक्तहरुलाई समाई कानुनी प्रक्रियामा ल्याउने कार्य गरेको कंग्रेस जिल्ला सचिव खिलध्वज पन्थीले जानकारी दिनुभएको थियो ।

पन्थीले कांग्रेस हरेक समस्या शान्तीपूर्ण रुपमा निकास चाहने देशको मुल पार्टी भएको बताउनुभयो । तर सत्ताको प्रभावमा प्रहरीले उदासीनता देखाएपछि आन्दोनमा होमिनु परेको उल्लेख गर्नुभयो । प्रहरी कमजोर हुदाँ प्रत्येक नागरिक कमजोर हुने बताउँदै कांग्रेसले पीडितलाई न्याय दिलाउनका लागि आवाज उठाई रहने उल्लेख गर्नुभयो ।

यसअघि नेपाली कांग्रेस गुल्मीका सभापति भुवनप्रसाद श्रेष्ठले जतिबाधा कष्ट परे पनि बर्बर राज्य आतङ्क नसहने बताउनुभएको थियो । सामाजिक सञ्जाल फेसबुकमा स्टाटस लेख्दै हजार घात खान तयार रहेको तर न्याय प्राप्तिको संङ्घर्षबाट विचलीत नहुने उल्लेख गर्नुभएको थियो ।

पत्रकार सम्मेलनमा कांग्रेस सचिवद्वय खिलध्वज पन्थी, बिष्णुकुमारी सापकोटा, महासमिति सदस्य महेन्द्रप्रसाद भण्डारी, क्षेत्रिय सभापति भगतसिंह खड्का, रेसुङ्गा नगर सभापति छवि पाण्डे, नेपाल महिला संघ रेसुङ्गा नगर समितिकी कोषाध्यष निर्मला केसी, प्रेस युनियन जिल्ला अध्यक्ष रेशम कुवँर, पत्रकार महासंघ गुल्मीका सचिव टोपलाल अर्याल, पूर्वअध्यक्ष जर्नादन घिमिरे लगायत जिल्लास्थित विभिन्न सञ्चार माध्यममा सक्रिय पत्रकारहरुको सहभागीता रहेको थियो ।