विज्ञानमा महिला पुरस्कारको आवेदन खुला

काठमाडौँ, १५ माघ  । विज्ञानका क्षेत्रमा महिलालाई प्रोत्साहन दिन स्थापना गरिएको ‘नासो विज्ञानमा महिला पुरस्कार’को यस वर्षको आवेदन खुल्ला गरिएको नेपाल एस्ट्रोनोमिकल सोसाइटीले जनाएको छ ।

इच्छुक व्यक्तिले आगामी फागुन १५ गतेसम्म अनलाइनमार्फत आवेदन दर्ता गर्न सक्ने सोसाइटीका अध्यक्ष सुरेश भट्टराईले राससलाई बताउनुभयो । पुरस्कार दुई विधामा प्रदान गरिनेछ । व्यावसायिकतर्फ रु २५ हजार, प्रमाणपत्र तथा ट्रफी दिइनेछ । विद्यार्थीतर्फ रु १५ हजार, प्रमाणपत्र तथा ट्रफी प्रदान गरिने जनाइएको छ । पुरस्कार सन् २०१७ मा विद्यार्थीतर्फ दिव्या घिमिरे र व्यावसायिकतर्फ प्रणिता कार्कीलाई प्रदान गरिएको थियो ।

सन् २०१८ मा विद्यार्थी श्रीति श्रेष्ठ र व्यावसायिकमा प्रोमिशा मिश्रलाई दिइएको सोसाइटीले जनाएको छ । सन् २०१७ देखि पुरस्कार दिन शुरु गरिएको हो । सोसाइटीले खगोल र भौतिक विज्ञानका क्षेत्रमा काम गर्दै आएको छ ।रासस